|
|
Мон оски ялан, ялан тыныд оски…
Йонлыкме куяй уг пыд азяд!
Од, од вала. Тамактэ кыскид…
«Акыльтиз ни та шузи, - » малпад.
Ой, йыры бергаз. Шат юэмен?
Сюлэмез уд поя – тон янгыш…
Мон тодам уг вайы лек кылэн,
Мон тонтэк, дыр, улыны уг дыш…
* * * *
Кошкид…
Ом вералэ ни кылъёсмес,
Юнме ватим синвуосмес.
Ваче пумит одно вуом на…
Кошкид…
Од чупа ни поромытозь,
Од зыгырты лычсузьымозь.
Кепыраса киме сёти ни…
Кошки…
Висён аляз пось сюлэмам,
Синву бырдаз миндэр вылам.
Вунэтыны тырши ке но…
Кошки…
Пытсай шудме, изэн зиби,
Рольме шуди, аслым чаби.
Нош берытскын ой быгат ни…
* * * *
Шодысал ке сюлмы тынэсьтыд малпандэ…
Шып улэ пытсаса со лачмыт осъёссэ.
Дыртыса лэзъялляй эсепо лек сямдэ,
Вось лэчыт кылъёстэ ватыли пуртэсэ.
Паймытъяд но чемысь – тэргамысь дугдылид:
Посьвуэн куалекъяз вылтыртим шумпотон.
Оскыли, мон понна коня ке курадзид,
Коня ке но бордад лякыли яратон.
Но весяк пачканы дышымтэ ик вылэм,
Лопыръя, лопыръя йонлыке лул пушкам.
Туж люкыт марлы ке та урам но луэм,
Берпумзэ вамышъян лэзисько, дыр, возам.
* * * *
Гажамедлэсь ой шод кулэлыксэ,
Гочатыса бычатылид лулме.
Ненег уйшоръёслэсь шорид ческыт шомзэ,
Зарыт могзетъёсын борзытиськод юнме.
Гурлась сямдэ воштид улэптэмлы,
Нош осконме гылтиз кезьыт ырос.
Огнад лулзылиськод – огнам мон пыраклы…
Мукет сюлэм пушкын луод ини пыртос.
* * * *
Мон отисько, пиос, туннэ казиное.
Валтись кузьым – мынам сюлмы.
Тырмоз ини тырттэм возьны сое.
Я, жог тупаз, лэся, кылмы.
Тонэ туннэ мон пояло, тонэ кушто,
Тонэ эркияло, тонэ нош вылие жуто.
Я, тырелэ коньдон. Шат оскиды мыным?
Мон кошкисько… Кыче кузьым?
Эх, эх,эх… Бадзым ни мугорды,
Чольы быдза ке но овол визьды.
* * * *
Кык портэм дуннеысь сюлэмъёс…
Пось тылын гомало вирсэръёс…
Шедьтизы ас парзэс, быризы,
Канжаськиз улонзы, кемжизы…
Яратон уг, уг лу чидатэк,
Колытэк, миндэрез коттытэк.
Кин мыным мукетсэ дышетоз.
Со сюроз – йырсазьтэк яратоз.
Вось луэ ке – одно чидано.
Яратон со кырзан, верало.
Кырзанэз туж секыт вордыны,
Яратон сюсьтылэз – утьыны.
Нырысез яратон – пыраклы,
Кызь арес-а, вуид ньыльдонлы.
Со Котьку сюлэмез шунтылоз…
Ойдо чок, улон куазь ке зороз!
* * * *
Льомпу зынъёссэ волскытэ, кудзытэ,
Сюлэммес кылзыса сылиськом чошенак.
Вераськод пояса, сутыса кылъёстэ,
Вешалля, мынялля дуннее котырак.
Сальытэк тон од чида, куштид ширмаме,
Нош сюлэм весь тэтча, макмырен шокаса.
Шат льомпу пазяське, быдтыса льоль шудме,
Оло нош пороми, чупамдэ шодыса?..
* * * *
Визнаны васькалляд яратон шур дуре.
Курикад мон ой шедьы – данъяй эрикез.
Нош огпол чидатэк, куртчиськи курикад,
Та гомзись мылкыдме мон пазьги сюлэмад.
Эриктэк нош – векась, вай гадь тыр шокчыны,
Пыд дорад улонэ… Ой, эн шедь лёгыны!
Одигнам гинэ ой, ой вал, дыр, шузи…
Пояськи. Курикад мон гинэ шат сузи?
* * * *
Тон малпаськод – тонэ яратисько?
Эн оскы, эн, эше, мон поясько…
Мынам сюлмы измиз ни кемалась,
Та дуннеын оз шедь лулме валась.
Мон дышемын лобан – весь музъеме лёго,
Вань мылкыдме, малпанъёсме сого.
Мон оскыли куке, шодид асваланме.
Вось пояськи: эн яраты табре юнме.
* * * *
Ос куара йырвизьмам шуккиськиз,
Сюлэмы вень понон кадь луиз,
Но эн малпа, уг мыны сьорад,
Тон осэз та вие уг пыдсад.
Тон, тон карид ук монэ синазькыль,
Тон од вала монэ, од но выр…
Чок, быриз чиданэ, пельёсме чоксало,
Сюлэмме пыраклы тон понна ворсало!
|
Поддержка и разработка © Niko 10/13/2007 22:24 a-niko@inbox.ru |
 |
|
